如何包養「電競」做二奶

一腳踏兩船之如何包養「電競」做二奶

相信有打開機嘅巴打都會明白,最大嘅敵人未必喺你嘅對手,最驚佢Gank你嘅未必喺對面隻JG,最troll game嘅未必喺你嘅豬隊友,而係一眾巴打都夢寐以求嘅「女朋友」。

Faker都話過,喺佢打職業嘅期間,唔會計劃搵女朋友,以免影響集中力,影響訓練。就連打緊NBA湖人隊嘅波仔,最近都因為要專注訓練同周圍長佂打比賽,而同女朋友鬧分手。當然啦,我哋又唔係職業選手,唔會去到咁極端嘅。我哋都喺想經營自己嘅終生幸福嘅同時,有返多少遊戲體驗啫。冇計啦!呢一種甜蜜的煩惱,你值得擁有。「能力愈大,責任愈大」,如果你決定包養「電競」做你二奶嘅話,喺需要好好諗下點樣經營嘅!而小編就有以下嘅心法同招式同大家分享。

心法1:「食得鹹魚抵得渴」
人生除左電競之外,你嘅另一半都係影響緊你嘅終生幸福。你係Faker咁,因為要打職業而暫緩幾年搵女朋友嘅計劃就話啫。當你一旦選擇咗開始一段愛情,就要有心理準備肩負起多一份負任,分配多一份時間喺經營愛情關係上面。所以「食得鹹魚抵得渴」,你都要諗下值唔值得為咗有多D衝Rank嘅時間,或者同FD喪玩嘅時間,而影響到自己嘅終身幸福吖!至少咁樣諗,你會覺得幾雷都值吖:)

心法2: 「輸了你嬴了世界又如何」
「失去你,贏了一切卻依然,如此冷清」嬴咗場Game,輸咗段關係,值得嗎?如果打打吓機比VIP Gank而輸咗嘅話當然會覺得好唔抵好氣憤啦,但喺如果因為一場Game嘅勝負而引起同另一半嘅衝突嘅時候,就更加唔抵啦!

招式1:長開WhatsApp網頁版
小編一直都好明白,有時放假打機一打就會想連續打至少兩三粒鐘,甚至更長嘅時間。咁樣做可能就會miss咗好多重要嘅WhatsApp訊息同埋call,後果不堪設想。但喺,你又絕對唔會想喺食緊巴龍,或者扔緊手榴彈嘅時候拎起部手機嚟撳。所以,必須要善用你死咗或者完咗場Game嘅時候,覆一覆機。長開WhatsApp網頁版有個好處,就喺可以一路打機時一路聽住有冇Msg響,喺你死咗果廿秒之間,即時縮細隻Game,用9秒9嘅速度覆一覆女朋友,甚至主動關心吓人,等佢都知道就算你打緊機都唔會唔關心佢嘛。如果你打緊嘅喺手機Game, 咁就更加值得同步用網頁版嘅WhatsApp覆機啦!

招式2:玩單機Game/開小帳輕鬆打
如果你知道女朋友差不多放工/放學/起身/同FD出完街等等,隨時會搵你嘅時候,咁就推介你用呢招啦! 橫掂你都預咗玩唔得耐,不如轉玩另一隻隨時都可以暫停或者Save低嘅單機Game(小編就會玩NBA2K19),或者開個細帳嚟玩,嬴咗就當幫個細帳升,輸咗都無傷大雅!

招式3:安排私人節目時間
一對情侶幾咁恩愛都好,往往都有唔同嘅興趣,需要各自嘅私人節目時間。適當咁安排同配合好各自嘅私人節目時間,抽一段時間各自同時玩自己鍾意嘅興趣,就可以盡情咁打機啦!如果女朋友最近仲未搵到有咩個別興趣想玩,強烈建議你推介佢睇吓最Hit嘅韓劇,衰D講句,荼毒吓佢XD!小編就鍾意睇李鍾碩同池晟嘅戲,《被告人》、《匹諾曹》、《當你沉睡時》等等都非常值得推介!

大技:「日子好與壞,在乎溝通與關懷」
其實以上嘅招式,嚴格嚟講,都喺治標嘅小技巧嚟。最重要嘅,都喺雙方抱住咩態度去經營愛情。小編一直都認為,電競同愛情喺絕對可以同時發展的。情侶之間如果平時有足夠嘅溝通同關懷嘅話,慢慢就會知道大家平時需要幾多私人時間,去發展個人興趣或者同朋友聯誼。呢一種愛情嘅經營,往往需要大家願意花時間去溝通同作出取捨。如果平時溝通足夠,畀到對方足夠嘅關心同安全感時,相信對方都唔會阻止你去打機嘅,所以不論作為男朋友定女朋友,都希望大家可以多D主動溝通與同關懷身邊嘅另一半!